O xogo dos Birlos é un xogo tradicional de lanzamento e de precisión moi antigo, en Galicia a súa práctica foi transmitida polos pobos xermanos durante as peregrinacións a Santiago de Compostela.
Que son os birlos?
Consiste en lanzar unha bóla de madeira a ras do chan cara unhas pezas verticais colocadas ao final da pista. Estas pezas tamén son de madeira e poden ter diversas formas. A intención do lanzamento é derrubar a maior cantidade posible delas. A puntuación será a suma da cantidade de birlos derrubados.
Como se xoga?
O número de birlos que se deben derrubar, vai dende os cinco como mínimo, ata os dezaoito como máximo. A distribución dos birlos pode formar diversos debuxos: unha liña, un círculo, unha cruz, un rombo, un triángulo…. Tanto o número de birlos, como a colocación e situación destes, depende exclusivamente da orixinalidade e o parecer onde se realice o xogo.
Pódese xogar por parellas ou por equipos. O lanzamento faise a pé parado, sen dar carreira. Tírase a bola 3 veces, cada birlo abatido puntúa 3 puntos que serán sumados nas 3 rondas. Gaña quen consiga chegar a 150 puntos.
Se queredes saber máis sobre xogos tradicionais galegos visitade a nosa sección da web Xogos tradicionais.
