Hoxe deixámosvos unha receita moi sinxela para facer na casa pintura de dedos. Poden axudar os pequenos na súa elaboración porque é doada e totalmente comestible.
INGREDIENTES E UTENSILIOS
1 cunca de fariña
1 cunca de sal
1 cunca de auga
Colorante alimentario (ou témpera)
Culler, recipiente para mesturar os ingredientes, batidora e pota para quentar a auga.
COMO SE FAI?
Mesturamos nun recipiente seco unha cunca de fariña e unha cunca de sal. Se queremos facer varias cores dividiremos a mestura en tantos recipientes como desexemos.
Por outro lado, fervemos unha cunca de auga nunha pota. Cando a auga estea fervida, engadímoslla á mestura da sal e a fariña.
Botamos seguidamente o colorante alimentario (tamén se pode facer con témpera). A cantidade de colorante dependerá da intensidade de cor desexada. Normalmente tenden a quedar cores bastante apagadas polo tanto, para facer cores vivas teremos que botarlle unha boa cantidade de colorante.
A continuación, remexemos cunha culler até conseguir unha pasta uniforme. Se queremos que a nosa pintura sexa densa e con grumiños xa rematamos. Pola contra, se preferides que a pintura teña unha textura máis homoxénea podemos pasar a nosa pasta pola batidora. Tamén lle podemos engadir auga para facela máis líquida se o desexamos.
E agora a pintar coas mans, con pincel ou con calquera soporte que imaxinemos. E non se preocupar por se enlarafuzamos a roupa ou as mans, sae facilmente con auga temperada.
